|
QURMÊ ZERÊ XO VECIME
İlhami Sertkaya
Zerê ma...
Kewerê zerê ma şıkiyo. Çıqas xırabiye u inkariye esta, qurmanê xo kerdê
zerê ma. Mordem ke, aqlê xo bıdo xızmeta qılêriye u qılêran, bıwazo mewazo
beno qefçıl. Qefçıliye aqıl de dest keno pıro. Gege mordem beno 'qıdayê
aqılê xo'. Waxto ke mordem rastiya xo de, kamiya xo de duri kewt, endi seba
xo nê, seba qefçıliye wo. Endi o kes, xo kerdo vindi.
A şiyene, o fek, i qesi, a qaytkerdene, o hewn, endi rastiya êy niya. Çı ke
mordem be xo rastiya xo de vısiyo endi. O kes endi beno dışmenê xo. Ruhê xo
biyo ser u bın. Kuno qompleksê de xırab. Kamiya xo ra tınazan keno,
edebiyat u kulturê xo, zon u zagonê xo kıckek vêneno. Seba dısmenanê xo
weş, seba dostanê xo nêweş o endi.
Qurmê dare ki heniyo. Se ke yêno zanayene, qurmê dare ke dare de mebo, a
dare pelan dana, xemelina, huna, roj be roj gılanê dare de baritiya weşiye
derg u hira bena. Vılê dare çewt nêbena, gılan de teyri kılamanê xo
'kaknenê'. Mordem a waxt qayil keno ke qaytê a dare bıkero, ebe
sareberz, qaytkerdena xo keremê gılanê dare keno.
Dara ke qurm tede ro, nêxemelina, xemıtina. Vıle çewt, miyanede derbına.
Roj be roj bena xırab, helina. Kes dara puçe nêşevekneno, çı ke a verba
çinibiyene şona.
Sebebê na bêwayirtiye, dare nê, qurmê zerê dare wo.
Qurm ke bıkıyo zerê mordemi, ya mordem qurmê xo qedêneno, xo xelesnano ra,
ya ki qurm mordemi qedêneno.
Qurm esto, xo be xo kuno zerê mordemi, qurm esto tewer de anê kenê
zere. Ez, qurmê ke tewer ra ardê kerdê zerê ma, qalê inan kena na ca de.
Hêştay serre de zêde wo ke, tewer ra dewleta Tırki i qurmi kerdê zerê ma. A
waxt ra nata, ma ebe qurmê zerê xo leçe kenime.
Zerê ma... ax zerê ma, zerê ma... Seba zerê ma zaf kılami u helbesti amê
vatene. Qurmê zerê ma, Serranê ma, domantiya ma u emrê
ma, ma de tırt. Qurmo ke rastiya ma, ma de vısna, ruhê ma kerd ser u
bın.
Coka ke derbın o zerê ma, barê ma gıran o. Coka ke ma hina xo be xo de halinime.
Hêlê ma wo ju usar o, rengıno, hêl o bin tariyo, kullın o. Serê no hard o
dewrêş de, na dınya hiraye de eke ma hina bınê bandora tırkan deyi me, eke
ma hina rastiye u serbestiya xo ser de zelal ni me, eke hina 'gend u guyê'
şari ebe ma leqe kenê, eke hina gewendi u serxoşi dawa serbestiya ma kenê
bınê 'tomete!', ma kami ra vacıme çı?
Qurm, zerê ma de ro, cayê de bin de megêrıme...
Kam ke, rastiye u kamiya xo ra wayir veciya, kam ke welat u tarıqa xo ra
wayir veciya, kam ke inkarê xo zerê xo de vet est sulandê tarıqe, kam ke
qompleks o bê xêr kerd bınê lınganê xo pan kerd, KAM KE BEŞE KERD Bİ ZELAL
U VENGIN QESİ KERD, êy kesi qurmê zerê xo vet o.
Ma seba rastiya xo, seba mıllet u şarê xo, seba xo vengê xo berz bıkıme ke
wa endi gewendi u zalımi ebe ma kay mekerê.
Çare u rayê de bine ke esta, kam ke zaneno, wa ma ra vaco...
Na xo be xo qapnayene çıqas çiyê de qefçıl u zeloqın o heqo..!
Wa zerê kesi me bo mexelê mali, garanê dawari...
Zerê kami de ke qurm esto, her çi ra ver seba rındiye u zelaliya xo veco.
Awa şıli u lımışe de, her qılêriye tede esta. Ma seba
welat u şarê xo, seba kamiya xo zelal bı me.
İlhami Sertkaya
21-11-2005
|
