|
|
HESENÊ
FÊRIZ
İlhami
Sertkaya
Hesenê Fêrız, Karêr de,
dewa Şirnan ra bi. Mordemê de manqul, qesepır bi. Zê awa vındetine zelal
bi. Ruyê xo yê qemeri de, çımê xo yê qıckeki, her tım vırdêne duri. Tı vana
her tım qaytkerdena xo, duriyan de çiye ra gêrêne.
Rast Hesenê Fêrız, her tım çiyê ra gêrêne...
Biyer u durışman, veng u qesan, xori fam kerdêne. Waxto ke şıma qaytê êy
bıkerdêne, zen kerdêne ke, o be xo, zê zafine çiyê nêfıkırıyêne.
Heni nêbi. Çımê xo her çıqas duri de bê ki, kewtêne zerê şıma u hal u merhalê
şıma wendêne. Şenık, hama pır qesi kerdêne. Heni pır u bı manê de xori qesi
kerdêne ke, gege şıma ra lom kerdêne, hama şıma fam nêkerdêne. Mecerisan de,
sıxletiye de, bêveng goş dêne qesan, waxto ke kesi êy ra çiyê pers kerd, gorê
i persan cuwabê de xori dêne ke, a ca de ya huyêne şıma, ya ki hêrs biyêne.
Endi çı ke gorê qesa şıma kewtêne para şıma.
Ebe ni hunerê xo, namdar bi Hesenê Fêrız.
Kam ke Hesenê Fêrızi nas kerdêne, ebe êy heni rehet nêşkiyêne bıkuyê
mınaqaşe. Çı ke zanıtêne ke, bınê cuwabanê Hesenê Fêrızi de, tujiya derzine
werdêne.
Çı hêfo ke, mordemê zê Hesenê Fêrızi ancina zê çıla bêwayire, xurba benê
verba çımanê ma de. Rınd ke mı be xo, ni mêrıki tayê nas kerd. Derheqê
biyeran de, wayirê fıkranê xori bi. Dısmenê neheqiye, gewendetiye u
quretiye bi.
Hesenê Fêrız ju zımıstan şono ju axayi ra şuyanetiye keno. Hama her roc, êy u
tayê dewıjan seba kutıkê êy munaqaşe u lec e kenê. Reyna rocan de rocê axa
pers keno;
-Hesen o çı qelebelıx bi, se bi?
-Axa wo delal, to payizi ama lewê mı, to mı ra va mı ra şuyane lazım o, to
nêva mı ra peliwan lazım o...
Axa vengê xı bırneno...
Rocê ancina kutıkê Hesenê Fêrızi axayi ra laweno. Axa kutıki dano verê
kemeran, hêlo bin deki, kıfır keno wayiri ra. Hesen heşêneno u kutıkê xo dano
vındetene u vılê xo verba axayi çarneno niya vano;
-Axa wo delal, mede kutikê mı ra, o nêzaneno tı axa wa...
Mordem şıkino seba Hesenê Fêrızi zaf çı bınusno, eke qimetê zanayê êy bızan
o.
Waxto ke o şiyêne şukan, şawqe kerdêne sarê xo. Dewe de zaf rocan telıka pê
kar ardêne. Rocê şono şuka Gêxi. Temsilkarê Gêxi(Qaymaqam) u ju memur o
Karêrıj, piya masa de roniştê. Memur o Karêrıj, temsilkari ra vano 'No mêrıko
ke dot ra yêno, Hesenê Fêrız o, zaf pêyayê de pır o, her kes ebe qesa pê êy
nêşıkino, tı ke wazena xo bıcerebne'. Temsilkar cerebneno. Venga Hesenê
Fêrızi dano;
-Keremke bê roşiye Hesen nuşeno ro, sılam kelam... Temsilkar;
-Hesen tı elewiya ya suni ya?
-Ez elewiya
-Qey tı suni niya?
-Ma qey tı elewi niya?
-Sunitıye rast a coka, ma elewitiye çı kê xo esto?
-Efendiyê mı, dınya aleme ke têlefon kerd, verde vanê 'Alo' nêvanê
'welo'.
Hunê, vengê xo bırnenê.
Hesenê Fêrızi, ebe ni fıkrê xo yê xori, bınê qesan de nêmendêne, wayirê
mêjoyê de pêt bi.
Ruhê to şad bo apo Hesen. . .
İlhami Sertkaya
8-10-2005
|
|
