İNKARÊ XO  BIXELESNE, BIQEDÊNE

Her çi, ebe zon dest dano pıro. Dewleta Tırki, coka ke, veri her çi zoné ma gırot u inkar kerd. Dımera, dore be dore tarıxa ma, welaté ma, edebiyat, kultur, kılami, adet u kamiya ma inkar kerd. Serba na inkariye ji, çı dest de ame kerd. Her çiyé ma kerd bıné bandora xo u ebe zordestiye ji, zılmé xo ramıt, hina ji rameno. Tenya méjoyé ma mendo. Na rayede, rastiye awa ke, xeyli menzil gırot. Çı ke, ma, yan wayire zoné xo rınd néveciyayme, yan ji, duşta inande taye şaşiye kerd. Ma her çi, ebe tırki pé kar ard. Ebe tırki nuştime ro, vastime ra, kewtime ra, ebe tırki sılaman da, sılaman gırot, hewnan u xiyalané xo ebe tırki dit. Ma, tırki ebe destan u feké xo ard  ké (çé)  xo. Ma, tırki kerd  huyayişan u berbuşané xo. Zoné ma, ma de duri kewt. Nıka ji, dewleta tırki, ni rojané péyénande ebe ma leqi kené u vané ‘Kırmanci ji kırdaski nézané’. No vate derse nédano ma gelo?.                           ZONE XO BIMUSE, QESİ BIKE, İNKARİYA XO BIQEDENE

Yan ji ebe tırki qesi kerdene, tı be xo destur dana inkariya xo. Ma se inkariye seré xo de ercenime?.

1-    Ma gere kemasiya zonqesikerdena xo de metersıme u qesi bıkıme

2-    Tayé saré xo bıdecnıme, zoné xo bımusıme

3-    Bıpersıme, bıdıme persene, qesi bıkıme, bıdıme qesi kerdene

4-    Verde çe xo de dest bıdıme pıro, dımera dormé xo de, heval u nasané xo teşwik bıkıme.

5-    Reklaman bıkıme, qampanyan rakıme, imkanan vecıme

6-    Bıwanıme,  bıdıme wendene bınusnıme

7-    Semineran bıdıme, dersan bıdıme, dersan bıgıme

8-    Kom bıbıme, béme télewe, plan u projan çé bıkıme

9-    Ebe zere hira, ebe sebır, bıxewetime

Béguman, béşık, zaf qeyde, çare u alternatifi esté. Hama ma ré ke xo be xo dest pıro kerd, şıkinime zoné xo ravér beme.

Coka ke ez vana: İNKARİYE  MA MEXELESNO, MEQEDENO, MA İNKARİYE  BERCIME SULANDE TARIXE.

Haydé zu be zu, péro piya,

 huçıkané hermané xo bancıme cor.

İlhami Sertkaya