RAYA ZERÊ MI

İlhami Sertkaya

Zerê her kesi de gorê xo wastene u ‘mıradi’ est ê. Her kes wazeno wastena xo bıbo, bêro ca. Na wasena xo de, emrê mordemi raya mordemiya. Raye…. .

Raye est a zaf teng a, ebe astengan derg bena şon a. Raye est a hira wa, mordem ebe rehetiye şon o. Raye est a, verba welatê zerê mordemi derg ben a. Raye est a mordem wazeno seba rayanê gırsan rew bıqediyo.

Her kes rêbiyê raya xo wo.

Wastena mı zê wastena domanan a. İ domanê ke, na dınya de ne xezna, ne talankerdene, ne vêşnayene, kıştene, qedexekerdene nêwazen ê… İ domanê ke ne fasadiye, ne dışmentiye, zeretengiye, ne xem zanen ê. İ domanê ke deq u dolaban, herb u zindanan, qanunê inkariye, şar u şarıstanan gırotene nêzanenê u nêwazenê. İ domanê ke zê têyrê serbestiyeyê. Ne wazenê kes qarçê bask u hermanê inan bıkero, ne ki wazena i be xo qarçê serbestiya kesê binan bıkerê. Eke destê mı de biyamêne, ez nêwastêne gırs bıbiyêne. Na destê mı de niyame u kes beşe nêkeno naye. Çı ke domantiye awa zelal a.
 
Na dınya domanan nê, pilan kerdo qılêr. Pêro zalım u dıktatori domantiya xo de niya nêbi. Her çık e bi gırs, bi zalım. Domantiya Hitleri de, yahudiyan qır kerdene niyamêne aqlê êy. Qorxut Eken, Memed Axar, Ecevit, İsmet İnönü, Atatürk domantiya xo de niya zalım nêbi. Çilere domantiya xo de dewan êwêşnêne. Domani ‘Helepçe’ xırabe nêkenê. Domani zon u kamiya kesi qedexe nêkenê. Nıka endi ez çı êfo ke nêşkina bıbi doman. Nıka tenya domantiye zerê mı de ro. Her tım wazena verba domantiya zerê xo sori.

Raya mı na wa.

Raya zerê mın na wa. .
 
İlhami sertkaya
18-08-2005