KAM ÇI RAMIT, AYE ÇINENO
İlhami Sertkaya  
 
No welat xelesino ra,  no şar reseno serbestiye...
 
Kê to vêşeno zılım! Zalım,  to ra nêmaneno...
 
Deq u dolabê şıma çare niyo. Ne hard,  ne azmên şıma qubul nêkeno. Ebe 'susurluxan', ebe qılêriye, nutuq u zurekeriye şıma mırad nêvênenê. Ebe 'inşala, maşala' endi kesi nêxapnenê şıma. Vêrd ra waxtê nezantiya ma. Bınê i pırdan de zaf awi derbaz bi.  
 
Ma çı di, çı nêdi...

'Rebê aleme' kesi mekero 'Bırayê' Tırkan. Nijadperestiya dewleta Tırki, zaf zalım u mıxenet o. Osmaniyan, seba padişatiye, piyê xo, bırayê xo darde kerdêne, kıştêne. Bınê i adetê qefçılan de, 'Jontırk'o bê xêr veciya. Qalê 'heq u huquqi' kerd, şarê ma qapna. Qapnayene çıka?A roca ra nata zılım varneno welatê ma de. A roca ra nata,  ma inkariye u adıran deyi me.
 
Tırk kışeno, vano 'seba sılametiye mı kerd'.

Tırk vêşneno, rışneno, vano 'seba hastiye mı kerd'.

Tırk xan u xırabe keno, vano 'ma mıletê de wayirê medeniyeti me.'
 
Tırk zonê ma, kamiya ma, inkar keno, şukan u dewanê ma de adır varneno, vano 'ma bırayê jumıni me'.

Tırk kameci şari ra va bıra, veşneno, rışneno, 'goniya xo keno pıra.'

Heya 'bıra!' Seke mı va, 'rebê aleme kesi mekero bırayê şıma'.
 
No welat xelesino ra, no şar reseno serbestiye,  tı 'xem' meke 'bıra!'
 
Tı karê xoyê 'medeniyeti' dewam bıke 'Bıra!' Meleti de,  zindanê Amedi de qefçıliye bıde insanan, susurlux de, Şemzinan de,  'huquq!'vıraze.
 
'Jıtem'anê newan pêyda bıke. Kam ke bi wayirê wijdani, karê şımayê qefçıli terıkna, ebe deq u dolaban bıkışe. Eşref Bitlisli bıkışe, Turgut Özal bıkışe. Dıme ra şo serê meyitê inan, 'sareweşiye!' bıwaze. Karê to ke rınd nêşi, ehmaqan de 'hizbullah' peyda bıke, karê to ke qediya, i ehmaqan bıkışê ke qesi mekerê. Meyit qesi nêkeno 'Bıra!'
 
Serê meyitan de, nutuqê 'medeniyeti' bance. Pıştiya xo bıde 'emperyalizmi', 'sosyalist u entelektuelanê!' xo ki ravır de mara qalê 'xırabiya emperyalizmi' bıkerê, ma bıkerê 'bınê tomete!’

No kay, kayê de zaf kano 'bıra!' Ma çı filmanê şıma di...

Endi ne deq u dolabê şıma pere kenê,  ne ki,  zurekeriye u dı rutiya şıma... İmapratoriya Osmani, şeş sed serre payde mend, şıma sed serre payde nêmanenê. Dınya, dınya paşa u padaşan niya. Mordemtiye endi  qefçıliya diktator u zalıman nêşkina banco.
 
Ya şıma benê wayirê aqlê mordemtiye,  ya ki mordemtiye şıma erceno sulandê tarıqe. Fatih Altaylı,  her roc rojnama 'Hüriyeti' de xo be xo pers keno vano;
 
'Ma kêy ben, me mordem?'
 
Kami şımara va ke şıma benê 'mordem?'.  Ya ki şıma wazenê bıbê mordem, kami raya çıma gırot 'baqılê mı!'
 
No welat,  bınê bandora şıma de xelesino ra,  no şar reseno serbestiye...
 
Şıma bandoriye, zalımiye  u talan ramıt,  sareberzkerdena ma çinenê Kam çı bıramo,  Aye çineno...
 
Ma şıma na rastiyê nêzanê...
 
 
İlhami sertkaya
12-11-2005