A KÊNEKE NA KILAME RA ZAF HES KERDE - O KIZ BU TÜRKÜYÜ ÇOK
SEVDİ

İlhami Sertkaya

'Tı sayêra serê rayede
Tayê rışnena zerê vayede'

Dı seri naye ra ver,welat de, dostê de mı, mı ra qasetê de kılaman ruşna bi. Kılami pêro zonê ma de bi.

Xora êy zanıtêne ke zerê mı de hesreta zonê ma esta. Serê qasete de, name çinibi. Mın nêzanıt na çı qaseta. Lerze mın qasete vet u kerd teyibe.

Ne veng ne vac... tayê bı sebır vıneta. Dıme ra vengê de zelal, vengê de kılamê ame. Goşê mı ke şi serê vengi, aqle mın xaf de şi neqebê dewa Pircanan. Mı xo 'Rastan' de zanıt. A ca de,awa deri de ajme kerd. Bınê daranê muriyan u sayan de merediya. Çımê mın verba verocê dewa Korkan de bi. Xiyalê mın dewa Êkmale de bi.

Ju kêneka dest u dı serre ame zeleqiya qaytkerdena mı. Fıstanê xo sur, ruyê xo sıpê bi. Dıme ra ju mêrık o extiyar verê mı de gıran vêrd ra.

Ez xiyalan de biya...

Goşê mı reyna gına kılaman ra. Çend kılami derbaz biyê, mı nêmard. Waxtê mardene nêbi ke...

Mı reyna bıskoca teyibe çerexna. Kılamê de bin veciya;

'Vanê hirıs u hêyşt ra nata vêşaniya Lacê mı çı pers kena, a ke ma diya kesi nêdiya'.

Na dolıme nuşta xiyalanê çım suran ra, şiya Dêrsım. Dewan gêra, neqeban veciya,ama çımê çemê Muzıri.

A ca de, domanê emrê ma, verba adır u koyan şiyêne. Destê inan de, baya serbestiya welatê ma amêne.

Pıştiya inan, tenya baweriya koyan de bi. Balışna inan kemer, cılê inan bır bi.

Ju vengo ke ez hama her roc heşênena, mı xiyalan de ant.

- Ez şıkina şıma ra çiyê pers bıkeri?
- Keremke delal a mı...
- No kam o kılaman vano?
- Ju kes tenya niyo.
- Çend kesê ma?
- Ma peroyime… Ni kılamê ma peruneyê...

Na delal a mına dest u dı serre, mabênê ni kılama de ju kılame ra zaf hes kerd u çend çekuyi kerd aqılê xo.

- 'Tayine vanê ma Tırkime
. . . . . . . . . . . . . .
- Wıle ni domani biyê har'.

Heya...  a kêneke na kılame ra zaf hes kerde. Her kes gorê xo, heskerdena Xo esta.  A  kêneke, a kılame kerd zerê xo u şiye. Waxto ke ez fırsend bıvêni, wazena a kêneke na kılame vaco. Gege vengê ma kuno têmiyan. Ma dore nêdanime zumuni. Ne hêrs biyene, ne zere şıknayene... Qey ma zerê zumuni bışıknıme?

A ebe hes kerdena xo, ez ebe hes kerdena xo.

Vızêri reyna a kêneke na kılame va.

A KÊNEKE NA KILAME RA ZAF HES KERDE…

İlhami Sertkaya
16-9-2005