ŞAŞİYE U MIXENETİYE
İlhami Sertkaya
Mordem, karê xo de
gege şaşiye keno. Keso ke kar bıkero, bıxewetiyo, çewtiye ki keno. Na ca
de, ez qalê na şaşiye u çewtiye nêkena. Tayê biyeri estê ke, endi
mordem nêşıkino ebe namê şaşiye salıx bıkero.
Şaşiye çiyê de bin a, mıxenetiye çiyê de bin a.
Keso ke ebe dışmenê milletê xo kar keno, keso ke fıkrê dışmenê mıletê
xo şevekna, na 'şaşiye' niya, raste rast mıxenetiya.
Ma, mıletê de bındesti me. Her çiyê ma qedexewo. Serê no hardo dewrêş de,
mıleto ke zê ma ebe her çiyê xo bındesto, ez bawer nêkena ke bıbo. Eke
esto, kam ke zaneno, kerem bıkero mı ra vaco, ez ki bızani.
Merhalo ke mıletê ma tede ro, jariyê de xoriya.
Ma, coka ke, na jariye de, miyanê ecêbiye deyi me.
Ecêbiye mabêne ma de tayê esta. Eger ke na ecêbiye u şaşiya gırse zê nêweşiye
tayê insananê ma de çinibiyêne, ne Tırk u taci ebe ma handay ebe deq u
dolabanê xo derg kerdêne, ne ki, ma hata nıka bınê bandora inan de nêbiyêne.
Ju wendoq yan ki 'roştibir'ê ma ke, seba pers u rastiya ma nê, seba çep u
meselanê şarê bini ebe namê 'enternasyonalistiye'! kar keno, no kes
endi rastiya xo de duri kewto.
Şıma ke qominist, sosyalist, demoqrat, oldariye yan ki, çepiye, rastiye
wazenê bıkerê, ebe rastiya welatê xo bıkerê. Şıma ke, entelektueliye,
malimiye, mısnayene, perwerdetiye wazenê bıkerê, seba persanê welat u
mıletê xo bıkerê.
Keso ke rastiye u kamiya xo de vısıyo, duri kewto, ebe fekê xo teyre bıgêro
ki, seba mıletê xo çiyê de muhım niyo.
Mordemê niyanêni, endi şaşiye de niyê, mıxenetiye de rê. Heskerdena
inan, fıkrê inan, kar u barê inan seba mılet u şarê xo, seba kamiye u
rastiya xo niyê.
Karê ma endi ma vacıme seba çep u rastê şari munaqaşe kerdene nê, seba
pers u problemanê ma bıbo.
Her kes karê xo keno, ma ki karê xo bıkıme.
Ma ra çep u rastê Tırkan lazım niyo, ma ra ma lazımi me. Xemê kesi
niyo merhaleyê ma. Kes kesi nêxelesneno ra. Her şar, xo xelesneno ra.
Ma ra politiqa u fıkrê rastiya ma hewcawo.
Zê dınya aleme...
Ebe munaqaşe u mujxulbiyena bêpêniye qederê ma niyo. Qederê ma niyo ma seba
persê bêmuhuman sarê xo bıdajnıme.
Kam sarê xo seba ma dajneno ke?
Xême kamiyo ke ma bınê bandora Tırk u Tacan deyi me?
Xemê kamiyo ke dew u warê ma wêşnê, ma niya bime vıla?
Xemê Kameji partiye u 'zanaye' wo ke çem u deranê welatê ma de awe biya
'sur'.
Rast bê ma xemê kamiyo..?
Qaytkerdene u hasar biyene ju niyê
Şaşiye u mıxenetiye ki mekıme têmiyan.
İlhami Sertkaya
9-11-2005
|
|