|
|
REYNA TI
İlhami
Sertkaya
Ez sori koti tı...
Cayê to,
xoriya zerê mı de ro. Tı kewta roc u şewanê mı. Tı usarê ruhê mına.
Adırê eşqanê zer belekan de buriyê to bırqinê. Qaytkerdena to, zımıstan keno
usar. Rêbiyê rayanê duri, pıştiya xo danê belekiya to.
Ju kêneka nıka Karêr de berbena, vengê a ye de tı. Asparê neqeban de, xiyali
seba to azmên kenê kewe.
Pêro hesreti, xemi, namê to neqışnenê. Koyi seba to dêm dinê, rayi seba to derg benê.
Tı sewda sed serana.
Ez qaytê kameci hêl bıkeri tı...
Mı to ra hes kerd, fermanê mı veciya. Mı vengê to da,
zıngıniye gına koyan ra. Kamiya mı de morê to esto. Mı şewan dêm da, rayan
kılm kerd seba to. Şukan
de tora pers kerd. Awan de, çolan de,lêlê sodıran de, muxurban de, şuyanê
eşqan de tora pers kerd. Gulê Karêri hesreta to da pelexiyayi.
Şewanê payizi xo kılm kerd seba to. Adırê locınan nêveşa, uştına kêyan şaniya
we seba to.
Xemê de bêbın pılêsiya serê sênê mı. Destê mı gına binê bıran. Sarê mı de
mılawini, mari kay kerd. Ni welatan, ni çeman, rayan, koyan, seba to derbaz
biya. Wêşan menda, têşan menda seba to. Destê mı lerca, ruyê mı vayan de
poyiya. Çinibiyena to de, mı jariya sed seran ant. Kemera sindoran de, name to ebe zerê
xo neqışna. Rêça to ramıt, hesreta to şımıt. Her sodır ebe sewda to
hasar bena.
Mı sarê gırot kameci xeribiyede şiya, kata şiya tı...
Odan de,
kıtaban de tı. Tutunê mı de, amayene u şiyena mı de tı. Bılura zerê mı de tı.
Baritiya kıbaran de, tariyê şewan de tı. Xas qenepçan de, gerdananê zeriyan de
tı. Hêybetê rengande, gul u nebatan de tı. Oxin u axan de tı.
Ez zana tı hêrsa, herediya. Tı serbestiya, baweriya omıda. Çı wext ke, sodırê
ma kewt bınê paniyanê şari, çı waxt ke nuştane u nişanê to emrê ma de veciya,
to sarê xo gırot u şiya. A roce ra nata, ma bê to sêwi mendime. A roce
ra nata qederê ma çerexiya. Bıra bi dışmenê birayi, domamanê xo vindi kerd
mayi.
A roce ra nata çemê Muzıri berbeno. A roce ra nata Karêr xeman u derdan de
mend, naleno. Asme şewan de vısiya, zerê bêriyan cemed gırot, raya zêv
u ziyaran xemetiya.
Bê... Tı kotiya?
Ez to ra gêrena, ma to ra gêrenime ebe sewda hezar seran.
Na senên xoritiya tı tede ra?
Ez şori koti tı... Ma şime koti tı...
Ewro mı ju nalina derge heşêna, ju doman trêne de vırara waya xo de berbêne,
dılopê hêstıran da reyna tı.
İlhami Sertkaya
17-9-2005
|
|
