KOMA HESRETE

Koma HESRETE  zazaki de ju koma Tiyatrowa.Tarıqa zazakide, derheqê tiyatroyide gama verenewa.Dolıma verêne 24-04-2004 de Hollanda de, şuka Den haag’i de veciya sahne.Aye ra wa ke, na tarıqe, seba tiyatroyê zazaki u seba xebatkarê KOMA HESRETE  muhıma.

KOMA HESRETE, her çi ke şi karê xo ebe profesyoneliye ramena.Hata nıka hirê dolıme vecıya sehne.  Raa çarine 21-01-2005 de Amsterdam de vecina sahne.Na kome verba proje u resmiyete şona.Name kayê vereni  HESRETE wa.Kome, namê xo ni kayê verênide gena.

KAYKERDOXÊ KOMA HESRETE:

1-ŞUKRİ ATİK

2- İLHAMİ SERTKAYA

3-ÖZLEM ATEŞ

4-ZELAL DENİZ

5-EYLEM TALİ

6-LATİF TALİ

7-ŞİLANE

8-ŞENGÜL DİKEN AKYOL

MUZİSYENE KOMA HESRETE:

1-ŞİLANE

2-SEUSEN

3-İBRAHİM

KOMA HESRETE, hata nıka hiré senaryo vet.Nusnoqé senaryoyi İlhami Sertkaya o. Namé senaryowan;

1-HESRETE

2-XILAMALO MUDURO

3-DOXTOR LASER

SEBA KAYE HESRETE, NUSNAYENA MUNZUR ÇEMİ

" Koma Hesrete"

Munzur ÇEM

9 oktobre 2004 de, ede paytextê Almanya Berlin de bi nameyê “Hesrete” kirmanckî (zazakî) kayêde tîyatroyî ame amadekerdene. Amedekerdox, “Kome Hesrete” bîye. Na kome, serrê na ra avê şaristanê Hollanda (Rotterdam) de dest bi nê karî kerdo.

Nuştoxê pîyesî Îlhamî Sertkaya, rejîsor kî o bi Şukrî Atîkî ra yê.

Çitur ke name de belu beno, temaya nê eserî hesret a. Hesreta ke şarê ma yê Ewropa seba welatê xo anceno, a ya.

Ma vajîme Hesen* o ke rolo sereke kay keno, merdim ke ey de nîyadano, vîneno ke o leşe ra welato pêşe der o, labelê ruhê xo welat de fetelîno. Aqil û fikrê xo, stîlê hêyatê xo, hata kincê xo, ê welat ê. Tekilîya xo û kêna xo Gulnaze kî nêvurrîya, ancîya goreyê welatî menda. Gulnaze, çiqas ke Ewropa de wanena kî kulturê miletî xo vîrî ra nêkerdo. O sebeb ra, mabênê aye û pî de problemêde muhim çîn o.

Memo, pirênê Hesenî ra dime yo, yanî ey ra qij o. Têpîya o kî çiqas ke cû/heyato newe der o kî têsîrê welatî ser o zaf o. O bi Gulnaze ra pîya hesreta welatî ancenê. Roniştiş, ravaştiş (raustiş) û qeseykerdişê înan ser o têsîrê tradîsyonê miletê ma zaf eşkera yo.

Labelê no nîno o mane ke şare ma yo ke amo qurvetîye, pêro no hal der o. Neslo ke welat de nêamo dînya, uca nêciwîyo, hal-hereketê înan û wasteyê înan sey ayê bînan nîyê. O, welato ke tede bîyê pîl, binê têsîrê kulturê ê welatî der o.

Ma vajîme ke Milkînaze kênekêda (çênekêda) azev a, labelê zulm û neheqîye firsat ci nêdo welat de bimano, rema ama îltîca kerdo. Dustê naye de Alik Ewropa de bîyo pîl, tekilîya xo û welatî çîna. Nê herdimîna di kesê cîya yê û mabên de zaf ferq esto. Milkînaze, memnun nîya ke ama îltîca kerdo, aqilê xo welatî ser o yo, ronîşten û ravaştena xo, qesey kerdena xo goreyê uca ya. Hama Alik winî (henî) nîyo. Seba ey o welat esto çino, ferq nêkeno. O, sey ciwananê Ewropa hereket keno. Ma vajîme ke o bi Anjelîka ra eseqîyê ro yewbînî (juvinî), hevalîye kenê. Çitur ke aqilê Milkînaze de Kurdîstan esto, sereyê (sareyê) Alik û Milkînaze de kî Amerîka û Kanada estê. Alik wazeno şêro Amerîka, Anjelîka Kenada wazena. Falcîye, eslê xo de binê têsîrê kulturê welatî der a labalê hen aseno ke kulturê welatê pêşeyî ra kî tayê çîyî girewtê.

No mîyan de tayê kemîyî estê ke merdim ganî ser o vinderone. Her çî ra avê eşkera yo ke tîyatro de ziwan (zon) û mîmîkî zaf muhim ê, hatta binge yê. Merdimî ke ziwan rind nêzana, qalîteya kayî bena kem. Çi hêf ke no het ra kaykerdoxan peroyîne de kemîye xo nîşan dana. Hêya, her kesî de eynî derece de nîya labelê zêde ya kî kem; esta. Kaykerdoxî ganî na rastîye bigêrê verê çiman û ziwanê xo avê berêne. Tenya kirmanckîya herema / mintiqa xo nê, ê cayanê bînan kî rind / baş bimisêne. Aye ra kî wet (dot) zaf biwanê, zaf qesey bikerê û binivîsnêne. Winî (henî) bo ke se ke awa hênî çirtike de rijîna şona, bi o tore qesey bikerêne. Tayê qisman de mîmîk û hereketî kî xeylê zayif ê. Kaykerdox ya kî kaykerdoxe gani zaf konsantre bo, bala temaşekerdoxan tema ser o kom kerone. Hen bo ke kesê ke nîyadanê, çîyêde bîn mefikirîyêne, bibêne parçeyêde meseleyî. Veng ge-gane zaf kem vejîno. Bêguman no hal, her çî ra avê, rewşa salon û hacetanê teknîkî ra girêdayo labelê organîzator û kaykerdoxî ganî na rastîye bigêrê verê çiman û aye ra gore xo amade bikerêne, tedbîran bigêrêne. Kay de, merdim biwazo mewazo pesîmîstîye cayêde zaf muhim gêna. Dustê naye de ganî mesajê optîmîstîye kî bêro dayene. Ma derdî rê derman lazim nîyo?

Pîyesî ra dime Sêyusênê Dêrsimij bi (ve) Íîlan Karêrije ra programê muzîkî amade kerd. Îvrayîmê Pasijî bi temurê (tomir), xorte kî bi gîtar program kerd zengîn.

Ez bi rehetîe şîkîn vajîne ke çiqas ke tayê kemîyî estê kî goreyê şert û şurtan, hem tîyatro hem kî programê muzikî serkewte bî. Dormeyê 200 kirmancanê Berlini bi keyf û dilşadîye program teqîb kerd. Na, gama virên a. Koma Hesrete demêde kilmek de xeylê mesafe girewto (gureto). A, ganî hem cesur bo, kemî û tengan ra meterso hem kî zaf bi dîsîplîn bigureyo, her roj avê şêrone û kemîyanê xo mîyan (werte) ra wedarone. Berxudar be Koma Hesrete, to rê serkewtene wazen.