MESO

Mı hesretande mevırde meso

Azmên gineno serê mı

Adıri varenê

Sarê xo gêna kuna rayan

Laseri kemeran dêmdanê zerê mı de

Çemi mıçıqinê

Vengi bırinê, tari benê rocê mı, bêkes manena dımera

Bê to manena

Mın hesretande mevırde meso

Xiyali benê kardi çımanê mı de

Ustina xaxê m şıkina

Sebrê mı rısino, axu beno xemê mı

Destê mı lercenê, neşkina qaytê rayan bıkeri

Usarê xêxi derbaz benê

Bêsılam, bêpers manena dımera, bê to manena

Mı hesretande mevırde meso

Kam kewerê mı keno ra

Kam kilamanê mı vano

Kam şewanê mı de çılayê sewda mı wêşneno

Kam hestıranê çimanê mı keno pa

Mı hesretande mevırde meso

Zeriya mı pelax beno, cemed gêno ruhê mı

Çalimê mı vındenê, pepungi wanenê paxande

Qırım kuno eşqan, talan beno baxcê mı

Derdi emrê mı çinenê

Mı hesretande mevirde meso

Mırena

Mırena....

.   

                         ASPAR

(Tı nêşkina ni rayande sorê aspar. Ni rayi newê, na astore kana. Tı nêşkina ni çemande raverê. Zaf awi derbaz binê ni pırdande. Ni tari, tariyê kani niyê. Ni koyi zaf çi di aspar, tı nêşkina)

Nıka ma aspar nime, astori zere ma de rê

Temê mayê kani rışiyê serê bêwayirtiye

Eşkerayê kılamê ma, vatê ma zelalê

Ne rayi mara endi duriyê

Ne tari çetinê

Ma, ters u xofê xo da verê vayan

Ebe goni namê xo nusna, ebe adır qesi kerd

Zaf dayime pero aspar

Zaf şime

Ma, astoranê xo seba vêyvê mesteyi kerdime zerê xo

Coka ke ma aspar nime, astori zere ma de rê

(Ni koyi çi di, çi nêdi aspar.Ni desti,ni çimi, ni hermi çi di çi nêdi. Ti nêskina ni sewande ravêrê. Ni zimi, ni neqebi ebe vengê ma biyê pır. Rengê çımanê ma, namê ma nas kenê. Nıka pêşkira zere,desmala sure destanê ma de ra. Vılê made dênê tarıqe. Gırano barê ma aspar)

Nıka ma aspar nime, astori zerê ma de rê

Ti beşe nekena aspar, nêskina ni şewande ravêrê

                            KATA SONA

Na şukede vengê bırino tı ke sorê

To nêvênena

Vindi benê ni kuçande rêça to

Xem kuno zerê mi

Rayande qaytkerdena mi risina

Berbena ti ke sorê

Ti ke sorê tenyatiya mi girs bena

Mari kaykenê bêwayirtiya mide

Na suke dêmdina serê mide...kata sona

Kata sona

Ni masan, ni bertengan, ni huyayisan cavırdana kata sona

Na kılame kam vano bê to

Kam waneno na helbeste

Vêyvê nêmede maneno tı ke sorê

Xezebê zeleqino zerê mı

Ez kuna hazazê derdan, lornena kes nêhesêneno vengê mı

Kengerê gılê koyan, vasê neqeban benê hevalê mı

Zê pepug her sodır verba tica sodıri wanena

Kata sona...

Ni koyande ez bêusar manena kata sona....

                                            KEWRA

Ni koyanê karêride kewra

Rêça emrê li menda

Melewne

Zerê mı adiran de ro

Ez adiran de ra

Ez ju gule biya ni koyanê karêride

Pelê mı her usar huyayşsanê belekan şimara kerem kerdêne

Rostiya çımanê beriyande bırqıniya mı vıla biyêne

Her sodır dewij vere'ê ıin de vêrdêne

Bover Dersim bi kewra

Bover Dara heni, Gimgim, koyê sipi

(ez ju gule biya kewra ni koyane karêride, her usar ebe baya xo amêne hewnanê şıma. Pil biyêne her usar kewra...bêşerefan ıin ıira kerd nêvırda, nıka pelexa verê vayande, torge da mı ra duri de ra)

Ni koyanê karêride kewra

Rêça emrê mı menda

Torge da mı ra

Hazazan de ra

Vısiya emrê xode

Pelaxa

Pelaxa kewra

Ni koyanê karêride kewra

Ez kuna huyayisanê domanan

Ma piya hunime

Hunime kewra

                         TI ŞİYA

Tı şiya

Tı şiya u na dewe bêwayir mend zerê mide

Ni rayi bêveng

Esqê zerê mı heliya

Ne bêderan çarnena hewnande

Ne astoran waznena mergande

Tenyatiya mı zê kemera

Sênê mı de domanê çım suri kay kenê nika

Tı şiya

Tı şiya u na suke bêwayir mend zerê mı de

Ni baxçi bêusar

Vayi porê mı misti nêdanê endi

Koyi xo nêxemılnenê

Hesretê derg bena bılura şuyanan de

Derguşê berbeno şewande

Ez bêkesiya xo şımena ebe rêça kulmê to

Ebe hesreta to mırena ez

Tı şiya

Tı siya u na kilame nême mend zerê mı de

Tı şiya

Letê cigera mı na hesretede heliya